A poesía de Manuel María engaiola aos nenos carballeses

Un ancián procedente do medio rural pasa os últimos días da súa vida no piso dunha filla nunha cidade galega calquera. Un día recibe a visita da súa neta, unha moza á que non ve dende fai anos. A través de distintos obxectos que o home conserva nun baúl, e a través das poesías de Manuel María, avó e neta van lembrar a non tan lonxana vida na aldea.

Esa lembranza da que fala Os soños na gaiola , libro senlleiro da lírica galega dedicada á infancia, converteuse en teatro por obra e graza da Compañía do Trinke Trinke e a editorial Xerais, que ten publicada a obra do autor chairego na colección Merlín e que apostou por este escritor e por este título, precisamente, para participar na campaña de animación á lectura que se desenvolve estes días na capital de Bergantiños.

O espectáculo de onte converteuse nunha homenaxe a Manuel María e ao cantautor Suso Vaamonde, que musicou os seus versos. Esta vez, a poesía conseguiu engaiolar a 170 alumnos do colexio Fogar, que tamén tiveron a súa parte de protagonismo nunha función na que se mesturaron música, literatura e xogo.

Durante os próximos días, a iniciativa que desenvolve a Secretaría Xeral de Política Lingüística, en colaboración coas editoriais e o Concello de Carballo, estará aparcada. Pero regresará con forza o 1 de decembro, xa que Kalandraka, que é outra das empresas participantes, ten programados unha exposición e unha serie de actividades que se desenvolverán ata o día 18 no Pazo da Cultura, e nas que participarán centos de nenos dos colexios locais, pero tamén de Coristanco e Malpica.